ສຳຜັດຄວາມມະຫັດສະຈັນຂອງທຳມະຊາດ ແລະ ລະບົບນິເວດຖ້ຳທີ່ກວ້າງໃຫຍ່ທີ່ສຸດແຫ່ງໜຶ່ງຂອງໂລກ
ຍິນດີຕ້ອນຮັບທຸກທ່ານເຂົ້າສູ່ອຸທິຍານແຫ່ງຊາດ ຫີນໜາມໜໍ່ ສິ່ງມະຫັດສະຈັນທາງທໍາມະຊາດ, ມີພື້ນທີ່ທັງໝົດ 94,121 ເຮັກຕາ ຕັ້ງຢູ່ ທິດຕາເວັນອອກສ່ຽງໃຕ້ຂອງປະເທດລາວ. ເຂດພື້ນທີ່ອະນຸລັກທີ່ສວຍສົດງົດງາມນີ້ເປັນຖິ່ນທີ່ຢູ່ອາໄສທີ່ສໍາຄັນ ຂອງຊີວະນາໆພັນຫຼາກຫຼາຍຊະນິດ ແລະ ບາງຊະນິດໃກ້ສູນພັນທີ່ມີລັກສະນະໂດດເດັ່ນລືກລັບທີ່ສຸດຢູ່ໃນໂລກ ແລະ ກໍເປັນແຫຼ່ງກໍາເນີດຂອງລະບົບນິເວດທໍາມະຊາດທີ່ຫຼາກຫຼາຍ ລວມທັງປ່າໄມ້ດົງດິບດັ່ງເດີມທີ່ອຸດົມສົມບູນ, ນໍ້າຕົກຕາດທີ່ສວຍງາມ ແລະ ລະບົບນິເວດຖໍ້າທີ່ມີຄວາມສະຫຼັບຊັບຊ້ອນເປັນຕົ້ນແມ່ນ ຖໍ້ານໍ້າລອດເຊບັ້ງໄຟ ເຊິ່ງເປັນຖໍ້າພູຫີນປູນທີ່ກວ້າງໃຫຍ່ທີ່ສຸດແຫ່ງໜຶ່ງຂອງໂລກ ທີ່ມີສາຍນໍ້າໄຫຼລອດຜ່ານທຸກລະດູການ.
ອຸທິຍານແຫ່ງຊາດ ຫີນໜາມໜໍ່ ຕັ້ງຢູ່ພາກກາງຂອງສາຍພູຫຼວງໃນເຂດພື້ນທີ່ມີພູຫີນປູນສູງຊັນຈໍານວນຫຼາຍ ແລະ ເປັນເຂດຊາຍແດນລະຫວ່າງ ສປປ ລາວ ກັບ ປະເທດ ສສ ຫວຽດນາມ ໂດຍມີຂອບເຂດຊາຍແດນທາງທິດຕາເວັນອອກຕິດກັບອຸທິຍານແຫ່ງຊາດ ຟອງຍາ-ແກບາງ ພື້ນທີ່ມໍລະດົກໂລກທາງດ້ານທໍາມະຊາດໃນປະເທດຫວຽດນາມ ແລະ ເມື່ອເຂດພື້ນທີ່ອະນຸລັກທັງສອງແຫ່ງນີ້ລວມເຂົ້າກັນຈະກາຍເປັນພູມິທັດພູຫີນປູນຂະໜາດໃຫຍ່ທີ່ສຸດໃນໂລກ. ຄໍາວ່າ “ຫີນໜາມໜໍ່” ແປວ່າ “ພູຫີນປູນທີ່ມີຍອດແຫຼມຄົມຄ້າຍຄືກັບໜໍ່ໄມ້” ເຊິ່ງໝາຍເຖິງພູມີທັດຂອງປ່າພູຫີນປູນທີ່ສູງຊັນທີ່ມີຍອດແຫຼມຄົມອັນເປັນເອກະລັກສະເພາະໂດດເດັ່ນທີ່ເກີດຂື້ນຈາກຂະບວນການວິວັດທະນາການທາງດ້ານທໍລະນີວິທະຍາ ເປັນເວລາ 300 ລ້ານປີ.
ອຸທິຍານແຫ່ງຊາດ ຫີນໜາມໜໍ່ ໄດ້ຂຶ້ນທະບຽນເປັນມໍລະດົກໂລກທາງທໍາມະຊາດຂອງອົງການ UNESCO ໃນວັນທີ 13 ກໍລະກົດ ປີ 2025. ການຮັບຮອງຄັ້ງປະຫວັດສາດນີ້ ໄດ້ປະກາດຂຶ້ນໃນລະຫວ່າງກອງປະຊຸມຄະນະກຳມະການມໍລະດົກໂລກສະໄໝສາມັນ ຄັ້ງທີ 47 ທີ່ນະຄອນຫຼວງປາຣີ, ປະເທດຝຣັ່ງ ໂດຍຖືເປັນມໍລະດົກໂລກທາງທໍາມະຊາດແຫ່ງທຳອິດຂອງ ສປປ ລາວ ແລະ ເປັນພື້ນທີ່ມໍລະດົກໂລກແບບຮ່ວມຊາຍແດນ (Transboundary) ແຫ່ງທຳອິດໃນອາຊີຕາເວັນອອກສ່ຽງໃຕ້ ເຊິ່ງເຊື່ອມຕໍ່ກັບອຸທິຍານແຫ່ງຊາດ ຟອງຫຍາ-ແກບາງ ຂອງ ສສ ຫວຽດນາມ. ທ່ານສາມາດອ່ານລາຍລະອຽດເພີ່ມເຕີມກ່ຽວກັບຄວາມໂດດເດັ່ນຂອງອຸທິຍານແຫ່ງນີ້ໄດ້ທີ່ ກ່ຽວກັບອຸທິຍານ
ຖ້ຳນ້ຳລອດເຊບັ້ງໄຟ ແມ່ນສະຖານທີ່ທ່ອງທ່ຽວຫຼັກທີ່ສໍາຄັນຂອງອຸທິຍານແຫ່ງຊາດ ຫີນໜາມໜໍ່ ເຊິ່ງໃນເມື່ອກ່ອນ ຊາວບ້ານເຄີຍເຊື່ອຖືກັນວ່າຖໍ້າແຫ່ງນີ້ເປັນແຫຼ່ງກໍາເນີດຂອງສາຍນໍ້າເຊບັ້ງໄຟ. ຖໍ້ານີ້ມີຄວາມຍາວເກືອບ 12 ກິໂລແມັດ, ສູງປະມານ 76 ແມັດ ແລະ ກວ້າງປະມານ 56 ແມັດ ເປັນຖໍ້າຂະໜາດໃຫຍ່ທີ່ສຸດແຫ່ງໜຶ່ງຂອງໂລກທີ່ມີສາຍນໍ້າໄຫຼລອດຜ່ານ.
ວິທີການເດີນທາງໄປຖໍ້ານໍ້າລອດເຊບັ້ງໄຟທີ່ດີສຸດຄື ການຂີ່ເຮືອຫາງຍາວຈາກບ້ານ ປາກພະນັງ ໄປຫາ ພື້ນທີ່ປາກຖໍ້ານໍ້າລອດເຊບັ້ງໄຟ ບ້ານ ໜອງປີງ ເພາະມັນເປັນການນັ່ງພັກຜ່ອນໄປພ້ອມກັບການຊົມທິວທັດທໍາມະຊາດພູຜາປ່າດົງ, ທົ່ງນາ ແລະ ຄວາຍລຽບຕາມສາຍນໍ້າພະນັງ ແລະ ເຊບັ້ງໄຟ ໂດຍໃຊ້ເວລາປະມານ 1 ຊົ່ວໂມງເຄິ່ງ.
ສາຍຫ້ວຍຮຸກໄຫຼຜ່ານຖໍ້າ 3 ແຫ່ງໃນເຂດພື້ນທີ່ປ່າຕົ້ນນໍ້າຂອງບ້ານ ທົ່ງຊໍາ ແລະ ມີເສັ້ນທາງຍ່າງຫຼາຍ ເສັ້ນທີ່ສາມາດຍ່າງຈາກບ້ານເຂົ້າໄປໃນພື້ນທີ່ຂອງປ່າດົງດິບ ແລະ ຜ່ານພື້ນທີ່ພູຫີນປູນຂອງອຸທິຍານແຫ່ງຊາດ.
ທ່ານສາມາດເດີນທາງໄປທ່ຽວຊົມນໍ້າຕົກຕາດຊຽງລື (ນໍ້າຕົກຕາດທີ່ມີສຽງດັງ) ຕັ້ງຢູ່ລະຫວ່າງເສັ້ນທາງ 7 ກິໂລແມັດຈາກຕົວເມືອງບົວລະພາ ຫາ ບ້ານ ໜອງປີງ ເຊິ່ງເປັນນໍ້າຕົກຕາດສູງ 80 ແມັດແຫ່ງນີ້.
ກິ່ວມູຢາ ເປັນທີ່ຮູ້ຈັກກັນດີວ່າເປັນຈຸດເລີ່ມຕົ້ນຂອງເສັ້ນທາງເຂົ້າສູ່ປະເທດລາວທີ່ມີຄວາມຍາວໄລຍະ 16,000 ກິໂລແມັດ ທີ່ເອີ້ນວ່າ ເສັ້ນທາງປະຫວັດສາດໂຮຈິມິນ. ທ່ານຍັງຄົງພົບເຫັນຮ່ອງຮ່ອຍປະຫວັດສາດໃນບ້ານຕ່າງໆ.
ເດີນທາງຈາກບ້ານ ໜອງບົວຕາມເສັ້ນທາງປະຫວັດສາດໂຮຈິມິນ ເຊິ່ງເປັນນໍ້າຕົກຕາດສູງ 20 ແມັດມີນໍ້າໄຫຼຕະຫຼອດທັງປີຊ່ວຍໃຫ້ທ່ານຮູ້ສຶກເຢັນສະບາຍ.
ອອກເດີນທາງຍ່າງປ່າທ່ຽວຊົມທໍາມະຊາດຕາມເສັ້ນທາງສັ້ນໃນຕອນເຊົ້າ ຫຼື ຕອນແລງ ຈາກບ້ານ ໜອງແສງໄປສູ່ຜາກຸດ ເພື່ອເບິ່ງລີງ.
ສຳຜັດຄວາມສວຍງາມຂອງທຳມະຊາດ ພູຜາປ່າໄມ້ ແລະ ລະບົບນິເວດອັນອຸດົມສົມບູນ ຜ່ານມຸມມອງພາບຖ່າຍຈາກອຸທິຍານແຫ່ງຊາດ ຫີນໜາມໜໍ່.
ສຳຫຼວດພູມສັນຖານ ແລະ ຈຸດສຳຄັນຕ່າງໆ ຂອງອຸທິຍານແຫ່ງຊາດ ຫີນໜາມໜໍ່ ຜ່ານແຜນທີ່ອອນລາຍຂອງພວກເຮົາ.
ເດີນທາງຈາກເມືອງທ່າແຂກ – ຍົມມະລາດ – ບ້ານ ຫລັງຄັງ (ແວະພັກຕາມວົງຈອນການທ່ອງທ່ຽວທ່າແຂກ) – ນອນພັກຄືນໃນບ້ານຫລັງຄັງ.
ເດີນທາງໄປເບິ່ງລີງຜາກູດ (ຜາລີງ) ໃນຕອນເຊົ້າ – ເສັ້ນທາງຫ້ວຍຮຸກ – ນອນພັກຄ້າງຄືນໃນປ່າ (ນັດໝາຍລ່ວງໜ້າກັບຜູ້ນໍາທ່ຽວບ້ານກ່ອນ) ຫຼື ເດີນທາງກັບໄປບ້ານຫລັງຄັງ.
ເດີນທາງໄປຕາດສອງຊູ້ – ເສັ້ນທາງປະຫວັດສາດໂຮ່ຈີ່ມີ່ນ – ຂີ່ເຮືອຢູ່ບ້ານປາກພະນັງໄປບ້ານໜອງປີງ – ນອນພັກຄ້າງຄືນໃນສະຖານທີ່ຕັ້ງແຄັມຖໍ້ານໍ້າລອດເຊບັ້ງໄຟ.
ທ່ຽວຊົມຖໍ້ານໍ້າລອດເຊບັ້ງໄຟ – ນໍ້າຕົກຕາດຊຽງລື ແລ້ວເດີນທາງກັບບ້ານຫລັງຄັງ ຫຼື ເມືອງ ຍົມມະລາດ ເພື່ອສືບຕໍ່ເດີນທາງຕາມວົງຈອນການທ່ອງທ່ຽວທ່າແຂກ ຫຼື ເດີນທາງກັບຜ່ານເມືອງມະຫາໄຊ ແລະ ທ່າແຂກ.
ບັນດາແຂກ ແລະ ນັກທ່ອງທ່ຽວທີ່ມາທ່ຽວຊົມໃນບ້ານ ແລະ ຖໍ້າຕ່າງໆໃນພື້ນທີ່ອຸທິຍານແຫ່ງຊາດ ຫີນໜາມໜໍ່ ຄວນຈ້າງຜູ້ນໍາພາທ່ຽວບ້ານທຸກຄັ້ງ ເນື່ອງຈາກວ່າໃນເຂດພື້ນທີ່ຂອງອຸທິຍານຍັງມີລະເບີດຍັງບໍ່ທັນແຕກຕົກຄ້າງສະໄໝສົງຄາມຈໍານວນຫຼາຍ, ຄວນຍ່າງຕາມເສັ້ນທາງທີ່ກໍານົດໄວ້ສໍາລັບນັກທ່ອງທ່ຽວ, ຫ້າມຖິ້ມຂີ້ເຫຍື້ອຊະຊາຍ ລວມທັງກົ້ນຢາສູບທີ່ສູບແລ້ວ ເພື່ອເປັນການຮັກສາຄວາມສະອາດຊ່ວຍກັນ, ຫ້າມນໍາເອົາທຸກສິ່ງທຸກຢ່າງທີ່ຢູ່ໃນພື້ນທີ່ອຸທິຍານອອກຈາກປ່າໄປເຊັ່ນວ່າ ພືດຕ່າງໆທີ່ຢູ່ໃນປ່າ, ຫ້າມສັ່ງຊື້ຜະລິດຕະພັນໄມ້ ແລະ ສັດປ່າໃນພື້ນທີ່ເດັດຂາດ ແລະ ຫ້າມໃຊ້ສຽງດັ່ງລົບກວນສັດປ່າ.